Carmela Mia (1903)

Addio Carmè’, dimane aggi’ ‘a partí.
I’ só’ surdato, ‘a Patria aggi’ ‘a serví.
‘A luntananza nun mme fa scurdá
‘e st’uocchie belle fatte pe’ ‘ncantá.
Tutte sti mise senza mme vedé,
sarraje sincera comm’io só’ cu te?

Carmè’, Carmè’.
T’aggi’ ‘a lassá
nun c’è che fá.
Carmè’, Carmè’.

Luntano ‘a te
chi nce pò stá?
‘A fantasia te turmentarrá,
a tanta cose te farrá penzá.
Tu si’ gelosa, assaje gelosa ‘e me,
comm’io geluso sóngo ‘e te, Carmè’.
‘Ammore vero nun se pò tradí.
Sempe ‘a reggina ‘e chistu core si’.

Carmè’, Carmè’.

E quanno, sulo, ‘int’ ‘o quartiere stó’
e ‘a passione turmentá mme vò’,
suspiro e vaso ‘o cierro tujo, Carmè’,
comme si chilli vase ‘e ddesse a te.
Da ‘o dito, ‘aniello mio, nun t’ ‘o levá,
scriveme sempe, ‘e me nun te scurdá.

Carmè’, Carmè’.

Oje mà’, dammíllo (1901)

Oje mà’, siente ‘a fanfarra?
Mo passano ‘e surdate.
E Tóre ‘nziem’a ll’ate,
mo passa, ‘o vuó’ vedé?

Cu ‘o zaino ‘ncopp’ ‘e spalle,
mme fa cumpassione.
‘O povero guaglione
tène surtanto a me.

Oje mà’, dammíllo,
ch’ ‘o voglio bene.
Appena vène,
mme spusarrà.

Totóre mio,
mme ll’ha giurato,
dopp’ ‘o surdato,
jamm’a spusà.

Quanno murette ‘a mamma
te ll’arraccummannaje,
a te te ll’affidaje.
Te ll’hê scurdato, oje mà’?

Dicette: “Quanno è gruosso,
si nun ve dispiace,
spósano ‘nsanta pace”.
Mo nun mm’ ‘o vuó’ dà cchiù?

Oje má’, dammillo,

Mo lle danno ‘o cungedo,
ajere mme ll’ha scritto.
Oje mà’, sa’ che mm’ha ditto?
Ca penza sempe a me.

Comme mme sbatte ‘o core,
penzanno ca mo vène.
Uh, quanto ‘o voglio bene,
nun t’ ‘o ppuó’ ‘mmagginà.

Oje mà’, dammillo..

‘O Surdato ‘nnammurato (1915)

Staje luntana da stu core,
a te volo cu ‘o penziero
niente voglio e niente spero
ca tenerte sempe a ffianco a me!
Si sicura ‘e chist’ammore
comm’i só sicuro ‘e te…

Oje vita, oje vita mia…
Oje cor ‘e chistu core…
Si stata ‘o primmo ammore…
E ‘o primmo e ll’ùrdemo sarraje pe’ me!

Quanta notte nun te veco,
nun te sento ‘int’a sti bbracce,
nun te vaso chesta faccia,
nun t’astregno forte ‘mbraccio a me?!
Ma, scetánnome ‘a sti suonne,
mme faje chiagnere pe’ te…

Oje vita, oje vita mia…
oje cor ‘e chistu core…
si stata ‘o primmo ammore…
e ‘o primmo e ll’ùrdemo sarraje pe’ me!

Scrive sempe e sta’ cuntenta:
io nun penzo che a te sola…
Nu penziero mme cunzola,
ca tu pienze sulamente a me…
‘A cchiù bella ‘e tutte bbelle,
nun è maje cchiù bella ‘e te!

Oje vita, oje vita mia…
oje cor ‘e chistu core…
si stata ‘o primmo ammore…
e ‘o primmo e ll’ùrdemo sarraje pe’ me!